Rev 12 | KZE | STEP | awánaawanda kwíyómpaꞋa umásítaiꞋa éna kwaási agaráátinkai-umasitaiꞋa maarán-úmásítáíꞋa éna moórá-ininko máyowana aaváúgó kwená unáánkwátóiraamba éna áúgomba ánáan-kwirowana máyowana kwíyónko aísamai-andampaꞋa kwáyowana aꞋnómpímbá kánumoꞋa kwáyowana minkánúmópímbá sísamaivakemba kaeꞋá kumbaimái-oꞋa kwáyowana

Revelation of John 12

aaraigónté arááínkóntéi kwaasái.

1 awánaawanda kwíyómpaꞋa umásítaiꞋa éna kwaási agaráátinkai-umasitaiꞋa maarán-úmásítáíꞋa éna moórá-ininko máyowana aaváúgó kwená unáánkwátóiraamba éna áúgomba ánáan-kwirowana máyowana kwíyónko aísamai-andampaꞋa kwáyowana aꞋnómpímbá kánumoꞋa kwáyowana minkánúmópímbá sísamaivakemba kaeꞋá kumbaimái-oꞋa kwáyowana 2 ámúkwaraꞋa máyowana kwená kanaamá túwana iyámpói ankáindayavena áíꞋa úwana kwááꞋa túwana 3 minkákémbá kwíyómpaꞋa moórá-umasitaikwaraꞋa éna kwaási agaráátinkai-umasitaiꞋa maará éna arááímbá anón-araaimba ména naaeyayán-áúgwáráꞋá ména avakaeté-aꞋnomba kwáyowana aꞋnómpínkémbá siyáánkai-awaayaamba kwáyowana usáyaaitaraiwaina kánumoꞋa avakaeté-kanumoꞋa aꞋnómpímbá kwáyowana 4 kaer-áyámpákén-óꞋá tuwéna moórá-ayampaken-oꞋa améraandei kwiyúmai awéntayuwowana marapáꞋá kumúwana iyámpói ankánín-ininkona egwaaꞋá ména ankáínaꞋa tuvúꞋ-nasuwánáe séna máyowana 5 inaamaíyámpói marankówana anón-éna amápaꞋ-maravaken-kwaasiraꞋa asiramái kawáá ínín-iyampoi marankówana Áánútu kárákwiyinintavena miníyámpóí ááéma mósá tavímairena kwemá kawááin-avaraꞋa móankowana 6 minínínkó inkaiséna kavóná-maravaꞋa kwéna Áánútu kwentávéna toꞋmayaa umánkanaumne sirópaꞋa koména ayáátáákaꞋa 1,260 kanaama komáyowana Áánútu kawáá uráiye.

7 kawáá úwasa kwíyómpaꞋa ááiꞋa tiyésa Áánútuna kwayóꞋnárawakaꞋa kárákwirowai áwíꞋa Máíkeri kwemá kwená kwayóꞋnáraware arááínkówé kwená kwayóꞋnáraware ááiꞋa tíyówasa 8 Máíkeriye kwená kwayóꞋnáraware usáyaaitesa kwíyómpakemba arááínkówé kwená kwayóꞋnáraware kwatuwésa 9 anón-araainkomba awéntáyukaawe. naaóváꞋá marapáꞋá iraankavayaambá aúkéna kwenáwíꞋa Sáátááni póna marapá-kwáásí kampar-áímbá simátímaꞋmaena kwéiyisasa áraiꞋa siyé kwésewana kwaási simái sáwíꞋa kwéumatiyuwaiye. kwenté kwená kwayóꞋnárawate tuwétayuwowasa marapáꞋá kunkáawe.

10 kúmúwaꞋa isááwánda kwíyómpaꞋa moóráwai anónkaꞋa séna

Áánútu aúrankaꞋa ména kentáásí kwaásiyavena sáwí-kwaasiman-owe kampaꞋá símae iráiwaimba awéntayuwaisana marapáꞋá kúmísana póna Áánútu Sáátáánigo tátokaimpinkemba kentáá mégwésiraiye. kentááráꞋá kawáá éna asirayán-úrandako póna mégwésiraisata awánaraumne. Áánútu aiꞋmarówana marapáꞋá kunkáiwaina asirayántá awánaraumne.

11 Ísu sipisípi-araakaawai miwítí sáwí-meyamba mairáiwai puwúwana kwená naaemá kunkáimba pósa Áánútun-aai arupí umái simátímaꞋmaesa kwéiyesa sínkamiyata puwúnavo-imayaa íma umbá asiramái mésa Sáátáánigomba usáyaaitaraawe. 12 keinárawaꞋa kwíyómpaꞋa máyáawai mináíntávéꞋa imáyáa éꞋa aamoí oró. ánivo Sáátáánigo marapáꞋá kumbéna sáwíꞋa kwéimba póꞋa marapáꞋá uwí-nómpáꞋá máyáan-kwaasi sáwíꞋa umái ménaaowe. Áánútu Sáátáánigomba tuvuwínín-kanaama sáwíyankaꞋa tínímba póna Sáátáánigo iséna áyántavena kwéiye kwíyómpakewai siráiye. 13 súwana minárááínkó áwíꞋa Sáátáánigo imáyáa éna kwíyómpakemba suwéntayuwaisaꞋa marapáꞋá kumbáyaumne séna inaamaiyámpóimo maránkaron-ininkomba kwaꞋmaéna kúwana 14 arááínkó minínínkómbá tuvúwívo séna Áánútu anón-evontaanko ayóíráámbá kaeꞋá amúwana araravámaena kavóná-maravaꞋa kwentávénamo toꞋmayaa umánkaropaꞋa kúwana Áánútu kaumbo-ímá umái avaꞋmoraé-kwiyomba kárákwiraiye. 15 arááínkó minínínkómbá kwaꞋmaéna óiꞋa kááꞋmaena nombá umpíyankaanana mayaꞋmaéna kówinkwae séna kwaꞋmaéna kúwana 16 maragó áwaꞋnaa ena kweyááríkaꞋa maramá kitúwana kwenóipinken-donko mimpímbá kumúwana arááínkó minínínkómbá áyántavena umánkena imáyáa éna séna kwenárááꞋmaatemo éꞋa ááiꞋa tiyánaumne-imayaa uráiye. kwenárááꞋmaaꞋa miwí Áánútun-aai ísámai kaweꞋá ésa Ísu siráin-aimba simátíméwaiman-owe. ááiꞋa tiyánaumne séna uwí-nón-awampaꞋa toꞋmayaa umái méraiye.

17